2025年10月16日

平淡嘅日子，但實在。

終於睇咗《Call me by your name》(再遲啲丫)

當然推使我去睇嘅，除左係首《Mystery of Love》，主要因為我終於可以無顧慮地做自己事。
以前睇過小說，主角太多內心小劇場，糾結程度堪比紫薇，睇左一半撐唔到落去。

雖然未睇完本書，但大抵都知講乜，電影比書出色得多，難怪拎到Oscar最佳改篇劇本。
甜茶唔係我杯茶，但無可否認演技的確好，無好似其他同志BL電影啲男人咁矯揉造作；即使本身年紀細，亦都唔係個個可以演得出純粹少年感，Elio呢個角色真係好似天生為佢而設咁。

未睇電影之前，我一直以為Call me by your name純粹就係Gimmick嘢咁上下。事關呢套戲之後，神奇既華語世界又幫套BL劇改左個名：以你的心詮釋我的愛…唔止㗎，幾廿套以你的乜乜乜…好無新意。
呢家啲小說同劇名就係咁Emo中二加無病呻吟，個名愈長愈好…anyway講遠咗，我一直以為CMBYN都係咁，直至中後段，呀Elio同Oliver一齊之後，Oliver同Elio講：「Call me by your name and I'll call you by mine.」我都仲心諗：「又係拎一句對白就做咗個書名。」

直至最後一幕，半年之後，Elio同Oliver回憶入邊嘅夏天呢家鋪滿白雪，Elio著住佢話過唔鍾意嘅花恤衫；以前淨係鍾意巴哈(佢係鍾意巴哈)，呢家就聽住流行歌跳住舞，有啲風騷輕佻，有啲唔似佢又有啲似Oliver;Oliver打嚟，Elio先估到佢結婚，然後佢就對住Oliver講Elio、Elio、Elio、Elio、Elio…
Oliver就答佢：Oliver…I remember every thing.

之後三分鐘Elio坐係火爐前，播住《Visions of Gideon》，不斷重複Is it a video? Is it a video?Elio喊完又笑，笑完又發呆，我終於明白書/片名原來唔係淨Gimmick嘢，Elio最終俾Oliver成為佢一部份，而Oliver或者都有成為Elio，但佢選擇置於回憶中；套戲一開始已點明，Elio呀媽叫佢鍾意食就食多隻蛋，Oliver答，唔洗了因為我知會食完一隻又會食第二隻…成年人何嘗不是，你當然知道有咩嘢令你快樂，但每個人都要盡可能活得長，有責任有被寄望，於是我哋學會自制。

另一我十分鍾意嘅當然係音樂。睇到中間時我心諗，仲未播《Mystery of Love》嘅？先睇mv未睇過套戲嘅我一直以為，呢首係主題曲，會貫穿成套戲。嗱，我又老套咗了，以為CMBYN會好似平時啲偶像劇咁。結果首歌出現係全片中後，Oliver離開意大利返美國之前同Elio去咗個short trip，配合意大利風光，歌詞輕聲細語：
Now my riverbed has dried
Shall I find no other?

觀眾已經知道故事會點結束的，如Elio一開始唔鍾意Oliver含糊其詞的「Later.」
好一首夏日終曲。

綜合來講，我覺得唔應該將CMBYN分類作同志電影，即使撇除同性愛部份，呢套戲都可以算係愛情電影經典。Elio爸爸結尾前同Elio講講番說話，我都好鍾意，詳細就唔記述了，我會提醒自己做個好似佢呀爸咁一樣包容到B豬嘅媽媽。

「你的人生是你自己的。」




充實咁過左一上午(邊做運動邊睇戲)，中午出咗去同朋友/舊同事食飯。
朋友向我訴苦，工作壓力大到佢上壓去到140幾，頭暈眼花。
「我終於感受到你之前講嘅壓力。」

朋友呢句說話有點Comfort(我並唔係幸災樂禍)，我一直都諗，係唔係我太懦弱，其實之前份工都唔係太難頂？事實證明唔係，原來我頂到已經好西利。
終於有咗一種告一段落嘅感覺，我原來唔係「逃跑需可恥但有用」。

午餐時點嘅玫瑰咖啡梳打，飲左一啖即後悔，似飲緊酒。



同朋友分別後去咗太古城，買唔到我老公想要既Kodak盲盒，只好轉戰去買餸。
於是就有了以下嘅美圖。

青醬豚肉蘑菇菠菜麵配蘆筍

唔止樣靚仲真心好食！
為平淡而完美的一天劃個句號。